برنامجنا باول يوم عيد

تابع يوم الثلاثاء 16-11-2010. . .

خلصت صلاة العيد. . .

ردينا بيتنا. . . تريقنا ريوق العيد. . . بعدها بدلنا و كشخنا و رحنا بيت الجدة الحنونة. . .صج ان مو كل اللي يو أعرفهم بس جدا استمتعت باليمعة. . .
أحلى شيء بالدنيا لما الانسان يكون عنده أهل يقدر يتصرف معاهم بطبيعية و بدون أي تكلف. . . الحمد لله لك يا رب على هذه النعمة العظيمة. . .

صارت الساعة 1:30 تقريبا. . . وصار وقت الغدا. . .عندنا طقوس بعايلتنا ان بالعيد لازم أكو بدلة للغدا. . . مو ضروري تكون يديدة بس لازم نلبس شيء غير بدلة العيد. . . بسم الله بدينا غدا. . . أحلى غدا. . . مكبوس لحم مال يدة. . . الحمد لله على النعمة. . . حدا كان عجيييييب. . .

خلصنا غدا. . . وصار وقت الجاي والتسدح. . .بس ما مدانا بس إذن العصر صلينا وردينا كشخنا عشان نستقبل المهنيئن بالعيد. . .

صارت الساعة 4:30. . .لازم أروح الشفت الثاني. . . بيت يدتي الثانية - الله يحفظها-. . .رحت و دخلت. . . سلمت على أهلي وباركتلهم بالعيد. . . إذن المغرب. . . صلينا. . . و بدوا الناس أييون يبون يباركون حق يدتي. . .أول اللي دخلوا كانوا كلهم محارمنا. . . و حريمهم. . . بعدها للأسف بدوا يدخلون ناس ما يعتبرون محارمي. . . بس محارم يدتي. . . جدا استاءت من الوضع. . . وحسيت بالحرج حيييل. . . بس مادري شنو لازم إسوي. . .

أنزين أكو دوانية رياييل برة. . . ليش ما يروحون؟!

قعدت وطول الوقت أنا منحرجة. . . ومن صج مادري شنو أسوي. . . المشكلة انهم ما قعدوا دقيقة أو عشر. . . للأسف قعدوا ساعة كاملة. . .

أتمنى مرة ثانية يا ان يقعدون بالديوانية أو أنهم يسلمون ويطلعون. . .

خلصت الزوارة و خديت أخواني طلبنا عشا وردينا بيتنا. . .


للأسف هالعيد نسينا شيء. . .
كل عيد متعودين ان يدتي تذكرنا بالتبرع للفقراء. . .فكل واحد فينا يتصدق بالمبلغ اللي يقدر عليه. . .
بس للأسف اليوم نست. . .
بس ان شاء الله غدا راح أذكرها. . .

الحمد لله عيدي كان صج سعيد. . .


« MY SeNioR YeaR »
21F5D591
مذكرات طالبة خريجة. . . B)
قروب للكويتيين فقط. . . :$
http://5rejat-2011.blogspot.com/