kenya tajhezeya


يوم الاثنين 31-1-2011. . .
 الحمد لله وصلنا. . . وأنا الحين أكلمكم من وسط كينيا. . . أمس الرحلة كلها استغرقت 12 ساعة. . . لأن كان في تأجيل للطيارة من الكويت بسبب الغبار. . . وصلنا وحدنا تعبانين. . . بس ماكو سباق بيني وبين اللي معاي منو يصور أكثر. . . الدولة ببساطة. . .
[ عجييييييييبة. . . ]ما توقعت الدولة راح تكون جذي أبدا. . . أمس ما رحنا مكان بس الجمعية. . . واليوم قمنا الساعة 7 صباحا وتريقنا و رحنا الجمعية وشرينا الأغراض للوفد اللي بيئ اليوم ان شاء الله. . . وبعدها رحنا في جولة حول ممباسا. . .طبعا أنا طلعت من الفندق وكانوا القروب اللي معاي شوي سابقيني. . . قاعدة أدور الباص اللي بودينا. . . وانطر وانطر. . . آخر شيء اكتشفت ان الجولة راح تكون مشي. . . ورحنا الجولة. . . ساعتين ونص من المشي. . . رحنا فيها حق القرية القديمة + الجديدة. . . +المبنى ما عيسى - عليه السلام- صليب. . .طبعا كان معانا 2 عشان يدلونا ويحمونا. . . كان في أشياء وأيد عجيييبة. . . بشطات وناس يبيعون كل شيء . . . والفاكهه في أشياء غريبة. . . جربت وحده من الفاكهه اسمها جاك (( أو شيء جذي )). . . وان شاء الله ما يصير فيني شيء. . .
 انصح كل الناس ان أييون. . .لأن صج عجييييبة. . .
 

انا مصر


  يوم السبت 29-1-2011. . .
 ما لي خلق شيء. . . ما بقى شيء على السفرة وأنا لما الحين ما طلعتلي جنطة ولا سويت ولا شيء. . .
 حدي تعبانة. . .
 اليوم مريت مكتبة الطالب عندي أوراق أبي أصورها. . . المهم وصلت هناك ومحد عطاني ويه. . . قعدت أشوفهم ولا كلهم اخوانا المصريين. . . قالي واحد منهم دخلي وروحي للكمبيوتر. . .
 قعدت الاحظهم واسمع تعليقاتهم. . . كل واحد كان مجابل كمبيوتر وكل واحد قاعد يتابع أخبار مصر. . .
 شعور مؤلم لما يصير أكو خلافات أو حروب بوطنك. . . الشي اللي يعور أكثر لما تشوف اللي الطاق والمطقوق كلهم من نفس الدولة. . . الشرطة المصرية تضرب الشعب المصري. . .
 الله يعينهم. . .
 
» اللهم امنا في اوطاننا واهد ائمتنا وولاة امورنا لمخافتك وتقواك
 اللهم من ارادنا واراد الاسلام و المسلمين بسوء فاشغله في نفسه ورد كيده في نحره «
 
 
« MY SeNioR YeaR »
21F5D591

TO DO LIST FOR ALSFAR


 
 يوم الجمعة 28-1-2011. . .
 بدأت العطلة. . .
 وأغلب الناس بتسافر. . .
 عندي بس 3 أشياء ودي أوصلها. . .
 أول شيء المفروض الناس لما تسافر يكون الهدف لتغيير الجو. . . بس الملاحظ ان أغلب العرب يطلعون من ديرتهم [ اللي كلها سوق ] ولما يسافرون يروحون حق السوق. . . فالقعدة بالكويت وأيد أحسن. . .
 لما تسافرون دوروا المغامرة. . . وعيشوا الوناسة. . .
 جربوا. . .
 لا تضيجون واسع إذا الشي مو حرام ليش ما نسويه؟!
 جربوا. . .
 من الدول اللي صج استمتعت فيها كانت كشمير ودلهي. . .
 ما كان فيها سوق ((سوق )) اللي كان فيها كان بسطات. . . بس جربت فيها أشياء عجيبة. . .
(( Rafting- fishing- swimming nl lake. . . ))النمسا كانت بعد عجييبة لأن جريت فيها air gliding. . .
 إذا سافرتوا ولقيتوا هالاشياء لازم تجربونها. . .
 
Air gliding
http://www.tourtravelworld.com/hotspot-images/para-gliding-10282.jpg
 
Rafting
http://www.xfellow.com/wp-content/uploads/2009/06/rafting.jpg
 
Snow jetski
http://www.travelizmo.com/archives/arctic-cat-f8-sno-pro-snowmobile-2009-1.jpg
 
Fishing in rivers
http://www.fishing-in-thailand.com/images/Jungle-River-Fishing-Chaeow-lan-may-09-136.jpg
 
Roller coasters
http://www.download-free-photos.com/blog/wp-content/uploads/2010/05/people-riding-roller-coaster.jpg
 
BaNaNa
http://www.allinflatables.com/shopping/towables/sleds/pics/10p_comm2.jpg
 بس الشي اللي إلا الآن ما جربتة بس ان شاء الله راح أجربه أهوا :
 
 
Ski diving
http://media-cdn.tripadvisor.com/media/photo-s/01/1e/62/43/skydive-lake-wanaka.jpg
 
 
 
« MY SeNioR YeaR »
21F5D591مذكرات طالبة خريجة. . . B)

التبرعات العينية


 يوم الخميس 27-1-2011. . .
 ما بقى شيء على سفرة كينيا. . .
 الحمد لله التبرعات وصلت 5000 دينار. . . بس هم عندنا طموح أن توصل أكثر. . . أقل شيء 7000 بإذن الله. . .
 النادي الطبي (( العجيب )) قرر أن يبي يساعد أكبر عدد من المحتاجين. . . فعشان جذي فتح بعد باب التبرعات المعنوية. . .
 ملابس فقط وإحذية. . .
 نستقبل هذه التبرعات إلى يوم الجمعة (( غدا )) @ 8 ليلا. . .
 هذه العناوين والناس المسؤولين. . . نتمنى إرسال مسج. . .
  
 
« MY SeNioR YeaR »
21F5D591

Zain... Mo Zain


يوم الخميس 27-1-2011. . .
 
THeRe iS a FiRST TiMe FoR eVeRYTHiNG. . .
 تخيلوا بعد عشرة طويلة. . . وأيام وسنين قضيناها مع بعض. . . عشناها بالحلوة والمرة. . .وكل شيء. . .
 أقوم اليوم الصبح ولا الإخوان بشركت زين قاطعين خطي. . .
 آفا بس. . . نسينا العشرة؟! نسينا العيش والملح والباستا؟!
 
 نسينا؟!
 الصراحة ما توقعتها منهم والله انصدمت. . .
 نسينا فاتورة دبي؟! نسينا فواتير الانتخابات؟!
 تقطعون خطي على 94 دينار. . .
 ولو. . .
 ما قدرتوا تنطرون لما أسافر. . .
 
 أطالب زين أن ترد خطي. . .
 ولا أحول فيفا. . .
 
 
« MY SeNioR YeaR »
21F5D591

لما تنكسر الصورة

يوم الأربعاء 26-1-2011. . .
 أكثر شعور مألم بالدنيا. . .
 لما تشوفون انسان انه قدوة في مجاله. . . وتشوفونه أن شيء وايد كبير. . . وتتمنون تكونون مثله من كثر ما أهوا عجيييييب. . .
 بعدين يسوي تصرف معين. . . متتشوة صورته جدامكم وتنكسر. . .
» صج أن الانسان مو معصوم من الخط بس خطأ عن خطأ يفرق. . . «
 وتحاولون كثر ما تقدرون أن تختلقوله أعذار. . . بس ماكو فائدة. . . طاح من عينكم!!
 
 
 حاليا أنا هذه مشاعري. . .
 
 
« MY SeNioR YeaR »
21F5D591مذكرات طالبة خريجة

MSHRoo3 DeRaSa


 
 
يوم السبت 12-2-2011. . .
 
قرار الدراسة قرار صعب جدا. . .
 
 
امتحاني يوم الثلاثاء ان شاء الله. . .
 
فقررت ان لازم أدرس. . .
 
ورحت الكلية. . . [ من الصبح ]. . .
 
بس أول ما وصلت وصلتني أيميلات لازم أشوفها. . . خلصت من الايميلات. . . وقررت أدرس. . . بس قلت لازم شوي ارتب مقرنا. . . فرتبته. . . بعدها قررت أدرس. . . بس وصلني بالفيس بوك أشياء لازم أسويها. . . بعدها تذكرت ان في أوراق ما خلصتها. . . بعدين تذكرت ان عندي وايد أشياء لازم ارتبها. . .بعدين توصلني مسجات what's app و بعدها BBM وبعدين facebook. . .
 
صراحتا الblackberry مشكلة. . . أي نعم حدا مفيد بالشغل ويساعد وأيد وأيد وأيد. . . بس لما تصير وقت الدراسة يصير مزعج لأن [ سبحان الله ] مادري ليش كل ما أفتح الكتاب وأقرر ان أدرس يوصلني مسج أو شيء يخليني إسكر الكتاب. . .
 
والحين قاعدة أحاول أقرر (( أروح حق العفاسي ولا لا )). . .
 
لازم أدرس. . . [ بس من صج مالي خلق ]. . .
 
و حدي يوعانه. . .
 
 
Aaaaaaaaaaaaaa. . .
 
 
« MY SeNioR YeaR »
21F5D591
مذكرات طالبة خريجة. . . B)

جمع التبرعات لكينيا


يوم الثلاثاء 25-1-2011. . .
 
النادي الطبي
[ عطاء وعمل ليبقى الأمل ]
كينيا 2011
 
إلى الآن مستمرين في جمع التبرعات. . .
 
تتوقعون كم وصلنا؟!
 
GueSS?!
 
الحمد لله بس طالبات المركز وصلوا
 
 
 
4375 دينار. . .
 
الحمد لله هذا من فضل ربي. . .
 
بس هم مو كافي. . .
 
نبي نوصل 7000!!
 
تتوقعون نقدر؟!
 
حدنا نقدر!!
 
 
ما بقى شيء على السفرة. . . حدااا عجيييييب. . .
 
هذا عن السفرة. . .
 
الحين نيي حق شيء ثاني. . .
 
السعادة. . .
 
أدري يطول الموضوع. . .
 
بس كنت بقول شيء . . .
 
[ ان السعادة هي قرار . . . ]
 
وانا قررت أن أنا راح أكون انسانه سعيدة أن شاء الله. . .
 
U 2. . .
 
لازم تقررون هالشي. . .
 
Be HaPpY. . .
 
 
« MY SeNioR YeaR »
21F5D591
مذكرات طالبة خريجة. . . B)

ما بقى شي على كينيا


 
يوم السبت 22-1-2011. . .
 
ما بقى شيء على سفرة كينيا. . .والى الآن قاعدين نجمع تبرعات. . .
 
مجموعة يديدة بديت اشتغل معاهم. . .الحلو فيهم ان مع ان أغلبهم أول مرة يشتغلون في شيء رسمي. . . إلا ان عندهم حماس وحب مو طبيعي للعمل. . . (( الله يتمم عليهم )). . .
كلهم عجيبين (( بس ماكو شيء كامل. . . لازم يطلع لنا أحد مقفل بالفريق. . . وهو الانسان مو غلط 100% بس يكون في أغلب الأحيان متعب. . . لأن يديد على الشغل ويعتقد ان طريقته هي الصح. . . ومن حقه ان يجرب. . . بس كل القدم بالشغل يحاولون ان يوصلونله ان مايبونه يطيح بنفس الاغلاط اللي طاحوا فيها ))
 
 
من بين كل الفريق شدوني 2 و إحساسي ان لهم مستقبل كبير في العطاء. . .
 
طالب وطالبة. . .
الطالب يعرف بالشغل. . . الشي العجييب فيه ما شاء الله ان مرتب ويبين استمتاعه بالشغل. . .ويشتغل بدون أي اهتمام بالمنصب. . . ومع ان عنده دراسة وأشياء وايد إلا ان نلقاه يقدم ويقدم ويقدم. . .
يعطيك العافية. . .
 
نيي حق الطالبة. . .
اللي صج انصدمت منها. . .
أثبتت بخلال أسبوع أنها انسانه قائدة من الدرجة الأولى. . . اللي صج يعجبني فيها أن لأنها تبي تعطي صح فكل شوي تلقونها تسأل شنو لازم أسوي وتقدم اقتراحات. . .
انسانه عجيبة من صج. . .يعطيك العافية. . .
وصدقيني تقدرين بروحك تكونين قائمة. . .
(( MT )) يا بختكم فيها. . .
 
 
 
حاليا أنا متشتته حدي. . . وبالضبط مادري وين لازم أقدم. . . بس كل اللي أعرفة ان الحمد لله على ان الله سبحانه وتعالى قاعد يعطيني فرض اني أقدم. . .
 
لكل طلبة وطالبات الجامعة. . .
العمل التطوعي شيء مو طبيعي. . . وكثر ما نقدم للعمل التطوعي كثر ما راح يعطينا. . .
انصح الكل ان ينضم للقوائم والجمعيات ويشتغل مع الناس. . . لأن بالنهاية الجامعة كلها 4 سنوات. . . حلو نستغل كل ثانية فيها بالعطاء. . .
وصدقوني كثر ما تعطون. . .كثر ماراح تستأنسون. . .لأن السعادة تيي بالمشاركة. . .
 
« MY SeNioR YeaR »
21F5D591
مذكرات طالبة خريجة. . . B)

academeya vs elnas


 
يوم الأربعاء 19-1-2011. . .
 
اليوم دخلت الكية عشان أقدم آخر امتحان فاينل. . .
 
والحمد لله قدمتة وخلصت. . .
 
المهم مو هذه السالفة. . .
 
قبل لا أدخل امتحاني رحت صوب كلية الطب. . .
 
حوسة ولوية. . .
 
شصاير؟!
 
أنا أقولكم السالفة. . .
 
دخل أحد أعضاء النادي الطبي على دفعة سنة ثانية. . . وسوا إعلان عن سفرة النادي إلى هولندا لحضور أحد المؤتمرات الخاصة بالطب. . .
 
المهم أهوا قال :
 
(ان احنا سوينالكم هذه السفرة لأن رابطة طلبة الطب الكويتية ما سوت (
 
طبعا قامت الدنيا وما قعدت. . .
ولأول مرة من 5 سنوات أشوف القائمة الأكاديمية مختبصين. . .
 
المهم رحت بعدها امتحاني وخلصت ورحت حق وحدة من صديقاتي ورديت معاها حق لوبي الطب قاعدين نجمع تبرعات. . .
 
بنص اللوبي كان نقاش حاد. . . بين أكاديمية (( الرابطة )) والنادي. . .
 
الكلام ينعاد وينعاد 100 مرة. . . ومحد راضي يقتنع. . . (( نقاش عقيم )). . .
دخلت بالسالفة. . . عشان أوقف النقاش. . . كان عندي سؤال واحد. . . و أجابته يا نعم يا لا. . .إلا وهو (( الرابطة بتسوي مؤتمر هالسنة ولا لا ((
طبعا الجواب كان مجموعة من صمون الفلافل والبطاط ومكثرين السلطة اللي فيه. . .
رديت سألت السؤال مرة ثانية وقلت لها أبي جواب أي أو لا بس. . .ردت زادت بهرات وسلطة. . .
 
بعد هالنقاش اكتشفت شيء. . .
)) في ناس المفروض ما تناقشونهم لأن مهما حاولتوا تناقشونهم بالأدلة فماراح يقتنعون. . . + صوتهم العالي راح يخلي الناس ماتفرق بينكم وبينهم. . . ((
 
 
« MY SeNioR YeaR »
21F5D591
مذكرات طالبة خريجة. . . B)

النادي الطبي في مقدمة البحث

النادي الطبي،،
(( شعليكم صايرين مقدمة بحث ))
 
ان ما أثار قلمي للكتابة في هذا الموضوع، وتقصي المعلومات عنه، هو ما سمعته من أختي التي تدرس في كلية العلوم الطبية المساعدة، ان لديهم نادي طبي طلابي يعتزم القيام برحلة إلى جمهورية كينيا الأفريقية وذلك من خلال وفد طبي مكون من طلبة الطب والطب المساعد بصحبة جمعية العون المباشر ممثلة بالدكتور عبدالرحمن السميط حفظة الله،،
فما الذي يدفع شباب وشابات في العقد الثاني ان يتنازلوا عن الراحة والرفاهية خلال عطلة نهاية الفصل للذهاب في رحلة فيها التعب لا محالة، والتي قد لاتخلوا من المخاطر أحيانا،،
بعد تفكير عميق أدركت ان هؤلاء الشباب قد تربوا على التجرد من الـ (( أنا ))، وتربوا على حب الخير لكل الناس مهما اختلفت ديانتهم أولغتهم أومستواهم المعيشي،وقد تربوا على حب المبادرة،، لقد أكبرت فيهم هذه الروح، وهذا الفعل، وهذا ما دفعني إلى الكتابة والقراءة في موضوع (( العمل التطوعي ))
 
النادي الطبي
[ عطاء وعمل،، ليبقى الأمل،، ]
كينيا 2011
 
 
« MY SeNioR YeaR »
21F5D591
مذكرات طالبة خريجة

ما شاء اللــــــــــــه

يوم الأحد 16-1-2011. . .
 شيء كانت كله أمي تقولي إياه. . .
 إذا شفتي شيء عند الناس وعجبك قولي
[ اللهم بارك لهم فيما رزقتهم وارزقني حظا مثل حظهم ]أو
[ ما شاء الله. . . تبارك الرحمن. . . ]
 ربي سبحانه قسم الرزق بينا. . .
 ومو كل شيء أنا أتمناه عندي. . .
 في بعض الأشياء أنا أتمناها بس ربي رزقها غيري. . .
 بس أنا صج أبيها!!
 لأني - أظن - ان فيها خير لي. . .
 مثل سيارة معينة أو موبايل أو سفرة أو كلية أو أي شيء بالدنيا. . .
 بس مو قادرة أحصلها. . .
 الشي الوحيد إليي أقدر أسويه بهالحاله اني ادعي ربي سبحانه ان يرزقني الشي الفلاني [ إذا كان فيه الخير لي ]. . .
 أنزين مثلا أنا قاعده أتعامل مع وحده وربي رازقها كل شيء أنا أبيه. . . شنو أسوي؟!
 اصكها عين أو أحسدها؟!
 لا لا لا. . . هذا غلط. . .
 الشي اللي المفروض ان ادعيلها ان الله يباركلها بهالرزق. . . ويسعدها ويعطيها كل خير. . .
 ولازم نوقف ان نقارن نفسنا بغيرنا. . .
 أنا سعيدة لأني أنا . . .
 حتى لو صارتلي مشاكل و نعفست حياتي. . . فهي فترة وراح تعدي. . .
 وكلا حطوا ببالكم. . . مثل ما أنتو تتمنون أنكم تكونون أحد ثاني. . . ففي ناس ثانية تتمنى ان تكون أنتو. . .
 خلنا نتذكر النعم اللي ربنا عطانا إياها ونشكره سبحانه عليها. . .
 و تذكورا
[ ولئن شكرتم لازيدنكم ]
 
 
« MY SeNioR YeaR »
21F5D591مذكرات طالبة خريجة. . . B) قروب للكويتيين فقط. . . :$
http://5rejat-2011.blogspot.com/