FaMiLY GiVeS U PoWeR

يوم الخميس 23-12-2010. . .
 أحب الطلعة مع صديقاتي. . .لأنهم يطلعوني من جو الحوسة اللي أعيشة بالجامعة. . .ويخلوني أفكر بأشياء وأيد. . .واستمتع بنقاشاتنا. . وسوالفنا. . . وضحكنا. . .وكل شيء. . .أحبهم لأنهم علموني وايد أشياء. . .واحبهم لأنهم لا يمكن يقطوني على صخر. . .واحبهم لأنهم إهما إهما. . .
 كل خميس اطلع معاهم. . .المكان مو مهم. . .أهم شيء ان نروح و نغير جو. . .ونستانس. . .
 شكرا صديقاتي. . .
 اليوم قررت ان راح أغير برنامجي. . .قررت اطلع مع اخواني. . .
 جو الطلعة كله صار غير. . .لأنهم كلهم أصغر مني فما أقدر أسولف معاهم عن الجامعة أو الشغل أو أي شيء. . .+كلهم صبيان. . .
 فحتى السوالف لازم تتغير. . .استمتعت معاهم بالطلعة. . .وايد وايد استانست. . .حلو من فترة إلى فترة ان نطلع مع أهلنا. . .وإذا صج تبون الطلعة يصير لها طعم ثاني طلعو مع اللي أصغر منكم. . . لأنهم يصغرونكم و يفتحون مخكم على أشياء وايد. . .+يعطونكم أفكار وايد حق كل شيء بالدنيا. . .
 بعد ما خلصت ورديتهم البيت دقت علي بنت خالتي. . .يدتي عازمتنا على كستنه. . .رحنا وشوينا كستن. . .ولازم طبعا نضيف الطعم الغربي فسوينا أكلتي المفضلة
(( SMoReS ))

http://kenrashsoutdoorfurniture.com/files/2010/02/smores_lg.jpg
 وكلينا وكلينا. . . و مجابلين التلفزيون. . .أول شيء شفنا مقابلة بركات الوقيان مع الدكتور محمد الثويني. . .كانت عجيبة. . . الأخ بركات الوقيان من الإعلاميين اللي جدا جدا احترمهم. . .ويعجبني فيه ان تكانة ورزين مو مثل الباقي. . .بعدها شفنا حلقة تو الليل((ماكملتها لأن تأخر الوقت. . . ))
 استمتعت اليوم بكل لحظة قضيتها مع عائلتي. . .
 كلمة:
[ FaMiLY GiVeS U PoWeR ]فحافظوا على علاقتكم معاهم. . .
 
« MY SeNioR YeaR »
 http://5rejat-2011.blogspot.com/



WoRk WoRK WoRK

يوم الثلاثاء 21-12-2010. . .
I have
1- QuiZ 2DaY (( PRoCeDuRe )),,
2- ReSeaRCH HoMeWoRK (( THuRSDaY )),,
3- QuiZ oN THuRSDaY - PRoCeDuRe- (( 40 T oR F QueSTioNs ))
4- TRaNSLaTiNG a MeMoRY SuRVeY,, (( FoR ToDaY ))
5- RePoRT 5 PaGeS ((CoMPUTeR aPpLiCaTioN )) - 30/12 -
6- PRoPoSaL 4 ReSeaRCH (( 5 PaGeS )) - 30/12 -
7- 2 QuaLiTY aSsuRaNCe (( LaB RePoRTs )),,
8- QuiZ PRoCeDuRe -30/12,,

تدرون هذا شنو يعلمني،،

[ لا تؤجل عمل اليوم إلى الغد ]

شيء تعلمته. . . كان عندي كورس كامل عشان أسوي بحوثي بس كل يوم أاجل لما توهقت الحين. . .

أدعولي ان أخلص كل شغلي بالوقت. . .

+ ان ما أصير مينونة من الضغط. . .


« MY SeNioR YeaR »
21F5D591
مذكرات طالبة خريجة. . . B)
قروب للكويتيين فقط. . . :$http://5rejat-2011.blogspot.com/



شباب الجامعة و الاحترام

يوم الاثنين 20-10-2010. . .
 كلية الشويخ. . .
 دخلت. . . والملاحظ ان أغلب الشباب يلبسون غترة وعقال. . . شيء الصراحة نفتقدة بكليتنا. . .
 عندي:
 دشداشة = ريال. . .
 فصج استانست من كل الناس اللي لابسن دشداشة. . .
 المهم وصلت التجمع. . . كان وايد رياييل (( دشاديش )) واقفين حوالين القوائم والنواب. . .
 كنت حدي مستانسة. . . إلى ان قرروا الدشاديش ان يثبتون للكل انهم مو رياييل. . .
 شنو صار؟!
 موجة كبيرة من الدخان خنقتنا. . .
 عرفتوا سببها؟!
 بدوا الإخوان يدخنون. . . بدون أي احترام للي يمهم. . . صج خنقونا -الله يهداهم -. . . أدري ان لأن إهما برة فقانونا عادي انهم يدخنون. . . بس الصراحة لازم يحترمون غيرهم. . . المشكلة ان مو 1 ولا اثنين اللي يدخنون. . . مجموعة كبيرة. . . ويطفون زقايرهم بالزرع. . .
 والمصيبة الأعظم لما يا واحد وقط الزقارة على الزرع بدون لا يطفيها (( يدوس عليها )). . . فظل الدخان فترة وأهوا يصعد ويبخرنا. . .
 شبابنا الأفاضل مصرين ان تهلكون نفسكم هذا الشي راجع لكم. . . بس نتمنى ان تحسون فينا. . . الدخان مضر لنا. . .
 الله يهديكم ويحفظكم. . .
 وأظل أقول. . .
 لا للتدخـــــــــــــــين. . .
 
» حفظ الله الكويت وشعبها من كل شر. . . «
 
 
« MY SeNioR YeaR »
21F5D591مذكرات طالبة خريجة. . . B) قروب للكويتيين فقط. . . :$
http://5rejat-2011.blogspot.com/
 



جامعتنا وراحتنا

تابع يوم الاثنين 20-12-2010. . .
 دخلت كلية الشويخ. . .سفطت بمواقف الحقوق و مشيت إلى ان وصلت إلى كلية الحقوق. . . ولأن أنا مو من أهل الكلية وكنت بس بروح بحضر التجمع وبطلع فما نزلت معاي شيء. . . بس موبايلي و مفتاح السيارة. . .
 وصلت كلية الحقوق دخلت اللوبي وكان حيل زحمة مادري شنو البرنامج اللي مسوينة. . .
 المهم طلعت من كلية الحقوق و صلت كلية العلوم الاجتماعية عند النافورة. . . لما الحين ماكانوا بادين. . . قعدت أشوف البنات اللي حواليني وصج حسيت ان غريبة بينهم. . .
 شفت عدة أشكال:

1-      اللي مو متحجبات (( كلهم نفس الشكل. . . بوت و تنورة و skinny و قميص فوقة شال 4 أمتار. . . ))ولازم معاهم ستاربكس. . .والشئ اليديد اللي اكتشفتة ان 90 % من بنات الكويت شقر وعيونهم ملونة

2-      اللي متحجبة نفس الشكل بس شوي القميص أطول. . . ))

3-      اللي يلبسون عباية أكو نوعين النوع الأول عباية وسيعة وملفع عرضين والنوع الثاني عباية صيجة و نقاب - نوع خاص يسمونه تكفة لا تطيح -
 حسيت اني بمعرض أزياء. . . الصراحة الشي وأيد ضحكني. . .يعني أنتو يايين تدرسون فليش تسوون بنفسكم كذي؟!
 وشسالفة البوتات؟!

1-      فرو. . .

2-      بوت فوق الركبة. . .

3-      بوت مطافي. . .
 ترى والله من صج خرعتوا البرد. . .
 حلو ان يكون أكو لبس موحد. . . مو مثل الثانوي بس على الأقل يكون شكل واحد وأنتو فنتقوا فيه. . .
 بكليتنا يلبسون سكربز . . . http://www.medicalscrubshut.com/images/medical-uniforms-scrubs.jpg
 شنو الشي العجيب فيه ان مريح و مايضيع وقتكم وأنتو تفكرون شنو لازم تلبسون باكر. . .
 فدعوة للكليات يا وحدوا لبسكم يا لبسوا شيء بالمعقول. . . مالا داعي كل يوم كشخة استقبال. . .
 
 بعد قليل. . . ملاحظاتي على طلبة الشويخ. . .
 
 
« MY SeNioR YeaR »
21F5D591مذكرات طالبة خريجة. . . B) قروب للكويتيين فقط. . . :$http://5rejat-2011.blogspot.com/
 

حملة دستورنا كرامتنا

تابع يوم الاثنين 20-12-2010. . .
 اليوم بعد دوام المستشفى رحت حق تجمع القوائم اللي مسوينا بكلية الحقوق تحت شعار (( دستورنا كرامتنا )). . .
 أول قائمة تكلمت كانت قائمة الوسط الديموقراطي. . . قال كلام حلو. . . بس كنت متوقعة منه كلام أقوى. . .وأيد كلام كنت متوقعتة يقولة لأنهم (( القائمة الوطنية )) بس للأسف الظاهر نساه. . .
 ثاني قائمة تكلمت كانت القائمة الائتلافية. . . كلامة صج كان قوي (( الصراحة انصدمت لأن الانسان اللي تكلم منهم أول مرة أشوفة )). . . أكثر ما يعجبني بالقائمة ان بداية كل خطاب يبدون ب (( بسم الله والصلاة والسلام على اشرف خلق الله سيدنا محمد وعلى اله وصحبه ومن والاه )) - أحس تعطيهم قوة. . .
 آخر قائمة تكلمت كانت القائمة المستقلة. . . للأسف كان كلامهم مو مرتب. . . قال كم نقطة عجبتني. . . بس حسيتة كأنه كان متردد. . . (( وصوته كان مو قوي )). . .
 كنت أتمنى اني اكتب لكم اللي قالوا بس للأسف ماكتبته. . .
 بعد ما تكلموا القوائم تكلم مسلم البراك. . . بعدها النيباري (( استمتع لما أسمعه يدافع عن الدستور )). . . بعدها تكلم جمعان الحربش (( كلامه كان جدا جدا قوي وهو من الناس اللي جدا يهمني أسمع رأيه بكل المواضيع )). . .
 جدا استمتعت بالندوة. . . واللي صج صج حبيته ان كل القوائم تيمعوا عشان مصلحة الكويت. . .
(( إلا الإسلامية الصراحة مادري وينهم. . . ))
 
 بعد شوي بس بكتب عن كم شيء لاحظتة بكليات الشويخ. . .
 
« MY SeNioR YeaR »
21F5D591مذكرات طالبة خريجة. . . B) قروب للكويتيين فقط. . . :$
http://5rejat-2011.blogspot.com/
 



احلى مستشفى

يوم الاثنين 20-12-2010. . .
 ثاني يوم دوام مستشفى الرازي. . .
 شنو أكثر الحالات اللي تتوقعون قاعد تييلي؟!
 توقعوا؟!
 
 
 
 كســـــــــــــــــــــــوووووور !!
 الأطفال كلهم مكسرين. . .الشباب كلهم مكسرين. . .الشياب كلهم مكسرين. . . والشرطة كلهم مكسرين. . .
 شنو الحل معاهم؟!
 أغلبهم يايين بسبب حوادث السيارات. . .
 اكتشفت اكتشاف ان أغلب شباب الكويت لازم أكو صيخ في جسمهم. . . يا بريلهم أو بالحوض أو بايدهم . . . المهم ان أغلبهم مصيخين. . . والسبب يا سيارة يا سيكل. . .
 صج صج صج أشكالهم تعور القلب. . .أغلب اللي ايون يكونون صج متألمين. . .
 الشي اللي صج يضحك بالمستشفى ان أغلب الناس اللي بكلية الشرطة يكونون عندنا. . . بالضبط مادري شنو يسوون حق الناس بكلية الشرطة بس أغلبهم أييون لنا يطلبون منا ان نسوي لهم أشعة تثبت انهم مرضى حتى لو ما فيهم شيء. . .السبب ؟! تخيلوه!!
 يا ناس يا عالم. . . ولا عليكم أمر. . . على كثر استمتاعي في اني أسويلكم أشعة إلا أني صج أتمنى ان ما أييلي هالكم الهائل من المكسرين. . . مو لأني ما أبي اشتغل. . .بس لأن والله يعور. . . وما أبي أحد فيكم يتعور. . .
 ديروا بالكم على نفسكم وحطوا بالكم على الطريق. . . ولا تتكسرون. . .
 شكرا. . .
 
 
« MY SeNioR YeaR »
21F5D591مذكرات طالبة خريجة. . . B) قروب للكويتيين فقط. . . :$
http://5rejat-2011.blogspot.com/
 

وتبقى ذكرى لن ننساها

15-12-2010. . .

بنفس هالتاريخ بس قبل 3 سنوات. . .

وصلت الكلية شوي متأخر. . . كنت مواعدة مع رفيجاتي ان نيي ندرس. . .

وصلت الكلية. . .

أول ما دخلت. . . حسيت بشعور غريب. . .

حسيت ان في شيء. . . الكلية كانت حزينة. . .

نزلت صوب اللوبي تحت. . .

لقيت واحد من الطلبة ماسك كلينكس ويبكي. . . وواحد يلحقة يحاول يهديه. . .

كملت طريقي. . . اللوبي كان لوية. . . والشباب يبكون. . .

حاولت افهم شنو السالفة بس ما قدرت. . . كان حيل لوية. . .

بعد فترة مروا يمنا طالبات. . . سالناهم شنو صاير؟!

فصعقونا بالخبر. . .

الطالب (( فهد بوزبر )) - سنة 7 طب أسنان- توفى. . . [ الله يرحمه ]. . .

الخبر هزنا كلنا. . . قعدنا ندعيله ان الله يغفرله ويثبته عند الحساب ودعينا حق أهله ان الله يصبرهم. . .

http://www.youtube.com/watch?v=BJJEUEnXOzc&feature=youtube_gdata_player

خبر مثل هذا يخليك صج تفكر بحياتك. . .

إذا سألت أحد متى راح تتوب وتوقف الخطأ اللي تسويه. . .الرد دائما يكون مع السنة الجديدة أو رمضان أو لما آتزوج أو لما أصير 40. . .

بس السؤال. . .

هل احنا صج ضامنين ان احنا راح نوصل حق السنة الجديدة أو راح نوصل رمضان أو نتزوج أو نكبر؟!

هل ضامنين نقوم من مكانا؟!

[ ولكل أمة أجل فإذا جاء أجلهم لا يستأخرون ساعة ولا يستقدمون ]

الحمد لله إلى الآن احنا عايشين. . . حاولوا تشوون وايد أشياء زينة. . . و حبوا كل الناس و ساعدوهم ولا تسيلون بقلبكم على أحد. . .

اللهم إغفر للمؤمنين والمؤمنات والمسلمين والمسلمات الاحياء منهم والأموات. . .

ولا تنسون الأخ (( فهد بوزبر من دعائكم )). . . أدعوله بالرحمه. . . وان الله يوسع عليه في قبرة و يجعله روضة من رياض الجنة. . .

« MY SeNioR YeaR »

21F5D591

مذكرات طالبة خريجة. . . B)

قروب للكويتيين فقط. . . :$

http://5rejat-2011.blogspot.com/

أكبر انــــجاااااااااااااار

يوم الأربعاء 15-12-2010. .

الخوف. .

أكبر مأساة يواجهها الانسان في حياته. .

الخوف من كلام الناس عنا و من كلامنا عن أنفسنا و من المستقبل. .

أشياء ما أحبها بالدنيا:

1-الأغاني. .

2-علاقة الحب بين البنت و الشاب. . ((الخربوظة))

3-الملابس الضيجة. .

4-الناس اللي يقولون ان الحجاب مو فرض. . .

5-الشاب اللي يلبس دشداشة طويلة إلى تحت الكعب((لأن عقابة عند الله كبير)). .

يقولون:

-إذا ماسمعت أغاني أحس اني مو عايشة. .أموت بدون أغاني. .

يقولون:

-علاقة جادة نهايتها زواج. .((تقصون على منو))

-علاقة أخوية. .((عن الخرابيط))

يقولون:

-ما أعرف ما اكشخ. .أنزين كشخوا بس لا تنسون ان من الشروط ان اللبس يكون لايصف ولا يشف. .

أشياء سخيفة الله سبحانه حرمها علينا. .ومع هذا نعاند و نسويها و بعدها نطلب الفردوس. .

هل نقدر نوقفها؟!

حداااااا أييييييييييييي. .

شلون؟!

بس قرروا. .هذا أهم شيء وبعدها كل شيء راح يكون سهل ان شاء الله. .

أنزين شلون أنا متعودة ان أول ما أدخل السيارة أشغل الأغاني. .متعودة ان ما أقوم الصبح إلا وأصبح على حبيبي. .

شنو أسوي؟!

ما أقدر بدون هالاشياء. .

بلا نقدر. .

قرروا. .

احتمال تكون أول كم مرة صعبة. .واحتمال تشغلون الأغاني و بعد فترة تتذكرون أنكم بتقطعونها فتسكرون المسجل. .احتمال تقومون الصبح و تتصلون على الحبيب بس بعدها راح تتذكرون و تقررون ان تنهون المكالمة. .

بس تدرون متى أحلى لحظة؟!

لما أول مرة تدخلون السيارة و تشغلونها وما تفتحون المسجلة. .هني راح تحسون بالقوة. .

لما تقومون الصبح تبدلون و تخلصون شغلكم و تطلعون من البيت بعدها تتذكرون أنكم ما دقيتوا على الأخ الحسن -الحبيب-. .هني تحسون بالقوة. .

لما توقفون أنكم تسوون الأشياء اللي الله ما يحبها. .

يمكن تسمعون كلام من الناس. .ان ((ما شاء الله شنو هالديانة اللي فجأة نزلت عليكم)). .يمكن نفسكم تقولكم ((ان منو انتي عشان تقدرين تسوين هالشي)). .

هذا كله من الشيطان. .تعوذوا منه وكملوا باللي قاعد تسوونه. .لأن هذا الصح. .

كلنا أقوياء ونقدر ان شاء الله. .

1- قرار ان راح نوقف العمل اللي الله ما يرضاه. .

2- توبة إلى الله سبحانه ان ما راح أرد لهالشي مره ثانية. .

3- استغفار و استغفار و استغفار. .

« MY SeNioR YeaR »

21F5D591

مذكرات طالبة خريجة. . . B)

قروب للكويتيين فقط. . . :$

http://5rejat-2011.blogspot.com/

غباااااااااااااااار

يوم الاثنين 13-12-2010. . .

الجو برة عجيب غريب. . .

اللهم إني أسألك خيرها، وخير ما فيها، وخير ما أرسلت به، وأعوذ بك من شرها وشر ما فيها وشر ما أرسلت به. . .

أتمنى من كل الناس اللي قاعد يسوقون ان يديرون بالهم على أنفسهم و يركزون بالطريق. . . و ولا عليكم أمر لا تدوسون. . .

كلنا نبيكم. . . و أهلكم يبونكم صاحين مافيكم أي تشوه. . .

حاولوا بهالجوا ان تغطون ويهكم. . .ولا تخلون اليهال يطلعون برة. . . لأن مو زين لهم. . .

« MY SeNioR YeaR »

21F5D591

مذكرات طالبة خريجة. . . B)

قروب للكويتيين فقط. . . :$

http://5rejat-2011.blogspot.com/

ممكن اتحلطم شوي ؟!

يوم الأحد 12-12-2010. . .

ما عندي شيء أقوله. . .

بس ودي اتلحطم شوي إذا ممكن. . .

بالأسابيع اللي طافت صارتلي وأيد أشياء بس ما كتبت عنها. . .

فابي اكتبها الحين. . .

1- دكتوري طلب مني اكتب له اعتذار رسمي واقدمها لرئيس القسم لأن كتبت على امتحان الميدترم -حسبي الله ونعم الوكيل-. . .

2- دكتورتي مالت المستشفى نزلت لكل قروبنا انذار غياب لأن شافت وحده من قروبنا بالكلية قبل لا ينتهي دوامنا. . .

3- نزل لي انذار في مادة كنت حاضرة نصها. . . فمع انذار المستشفى احتمال ينزلي FA و إتاخر سنه. . . أول ما سمعت هالشي بكيت لأن مابي إتاخر أبي اتخرج. . . بعدها حسيت شوي بالغباء فمسحت دموعي وكملت يومي بسعادة و هناء لأني ماراح اسمح حق شيء مثل الدراسة يعكر مزاجي. . . و شنو المشكلة إذا تأخرت سنة. . .

4- دفعة 2007 اللي للأسف نزلت معاهم إلى الآن مو قادرة أتاقلم معاهم. . . لأنهم - ما شاء الله عليهم - قمة في النحاسة. . .

5- محرم. . . سنة و شيعة. . . خلنا نتفق اتفاق. . . سنة. . . كلنا نحب ال البيت و كلنا ان شاء الله راح نصوم التاسع والعاشر من محرم. . . ومحرم بالنسبة لنا مناسبة سعيدة ما نحزن فيها. . .و الأحاديث بهالشهر بالأخص حاولوا تتأكدون من صحتها. . . شيعة. . . محرم هو شهر حزن و عزاء. . .

أتمنى من السنة لا تتطنزون على الشيعة. . . والشيعة ما نسمح لكم بسب صحابتنا. . . أشيائكم الباجي مارسوها على كيفكم. . .

6- الناس مو كلها زينة. . . أكو ناس زينة و أكو ناس مو زينة و أكو ناس شكلها زينة بس داخلها أسود و أكو ناس شكلها مو زينة و قلبها أبيض. . . شيء تعلمته ان ما احكم على الناس من أشكالهم. . . اختلط مع كل الناس و أحب كل الناس. . . بس أشيائي الخاصة ما أقولها إلا للي أثق ان مهما صار بيني و بينهم ما راح يصروني. . .

7- جدا جدا جدا مستاءة من اللي صار بالكويت. . . حسافة على ديرتنا الديموقراطية- سابقا-. . .

شكرا لكم جميعا لأنكم خليتوني أفضفض. . .

« MY SeNioR YeaR »

21F5D591

مذكرات طالبة خريجة. . . B)

قروب للكويتيين فقط. . . :$

http://5rejat-2011.blogspot.com/

عمرنا يمشي ويمشي

يوم الأربعاء 8-12-2010. . .

اعتقد ان نص الكويت مو مداومة. . .

ومع هذا أنا مستمتعة اليوم. . . ليش؟!

لأن الصج الصج أحب دوامنا وايد. . .

شنو عندي أحلى المستشفى ولا دوام الكلية؟!

الصراحة اثنينهم. . . لأن كل واحد له جوه. . .

المهم. . . إلى الآن بمستشفى الفروانية. . . بس ان شاء الله اليوم راح يكون آخر يوم لأن الاسبوع الياي راح اداوم بمستشفى شيخان. . .

اليوم حطوني بغرفة هشاشة العظام. . .كل المرضى اللي يوا كانوا حريم كبار بالسن. . . وكلهم يبون يسوون اختبار هشاشة. . .

قعدت الاحظهم. . . و أفكر. . .

أكييد إهما كانوا بيوم من الأيام شباب مثلنا. . . يطلعون ويروحون و يردون و يشتغلون. . .و فرحانين بشبابهم. . .

ومع الأيام كبروا. . . وترهل جسمهم. . . والأشياء اللي كانوا يقدرون يسوونها بروحهم. . . صار لازم أحد يساعدهم فيها. . . حتى صعود السرير و النزول منه. . .

قعدعت أفكر إذا الله عطاني عمر وعشت وصرت 50. . . أول شيء هل كل أهدافي اللي حاطتها لي راح أكون حققتها؟! هل راح أكون حققت شيء للكويت؟! ثاني شيء (( أخليه لنفسي ))

بس ان شاء الله على ما أوصل هالعمر لازم أكون منجزة شيء للكويت والأمة الإسلامية. . .

حتى أنتوا. . . فكروا لما يصير عمركم 50 وين تبون تكونون واصلين و شنو الانجازات اللي تبون تكونون حققتوها. . .

« MY SeNioR YeaR »

21F5D591

مذكرات طالبة خريجة. . . B)

قروب للكويتيين فقط. . . :$

http://5rejat-2011.blogspot.com/

مسيرات كويتنا الحبيبة

يوم الاثنين 6-12-2010. . .

إلى الآن متأثرة بالمسيرة إلى أمس. . .لأن صج وأيد ناس صدموني. . .

مثال لما واحد رايح المسيرة مع بناته (( 14 و 15 سنه )) و مخليهم يطلعون من السيارة ويرقصون و الشباب يتحرشون فيهم و عنده ان الحياة حلوه. . . و اللي رايح مع خواته و الشباب يمين و يسار يتحرشون فيهم. . . والحياة حلوة. . .

أنا بس بفهم وين السنع. . .و وين الغيرة. . .

في مواقف مثل هذه يطلع الفرق بين الذكر والرجل. . .

[ كل رجل ذكر. . . ولكن مو كل ذكر رجل. . . ]

* الذكر: معروف من صفاته الخارجية. . . مثل اللحية و الشارب. . .

* الرجل: يعرف من صفاته. . . فهو فيه الشجاعة والمروءة والغيرة و وايد صفات عجيبة. . .

اللي أمس كانوا بالمسيرة كان بينهم الرجل والذكر. . . و كان واضح جدا الفرق بينهم. . .

الله يحفظ شبابنا. . .

بس نتمنى ان بالمسيرات القادمة ان يصير أكو رقي أكثر بالمسيرة. . .

عشان نستانس صج. . .

« نتمنى ان اليوم اللي بروح حق استاد جابر ان يفكر قبل لا يتصرف. . . و خلو الناس يستأنسون. . . »

<< MY SeNiOR YeaR>>

21F5D591

ال20 خدينا نصها

يوم الأحد 5-12-2010. . .

فزنااااااااااااااااا. . . والحمد لله الكأس للأزرق. . .

تعرفوني مو من النوع اللي يشوف ويسكت. . . لازم أتكلم. . . فعشان كذي راح أتكلم. . .

طبيعيا بعد كل مباراة نفوز فيها الشعب الكويتي يسوي مسيرة تعبيرا عن فرحتة بالفوز. . .

بس كأي بلاد عربية (( للأسف )) فاحنا ما نعرف أي شيء عن آداب المسيرة. . . بس يروحون 3-4 شباب بسيارة وحدة و رايحين رادين. . . يتحرشون و يغنون و يرقصون. . .

+ ماكو أي احترام لأداب الطريق. . . شلون يعني؟!

يعني ان قاعدين بتقاطع 4 إشارات. . . فالأشارة اللي صوبنا تكون شابة خضراء بس الشارع اللي جدامنا يكون واقف فالمفروض اقعد انطر إلى ان يفضى الشارع عشان أمشي. . .

بس اللي صاير ان كل واحد مو مهتم أهم شيء نفسة. . . فبالنهاية كل الإشارات يعتبرها الناس خضراء و يمشون. . . بعدين تصير المشكلة. . .

المهم كنت طالعة من بيت يدتي إلى بيتنا. . .تخيلوا ان الشارع كان واقف. . . ساعة كاملة عشان نوصل حق الإشارة اللي تفتح و تسكر ومحد يمر. . .

المهم. . .

دقيت على الشرطة و قلتلهم أييون. . . بس ما يوا إلا بعد وقت طويل. . .

صراحتا . . . يتلي فكرة ان أنزل واروح انظم السير. . .بس ماسويتها. . .

فو أنا قاعدة انطر شفت منظر هزني. . .

تخيلوا ان اثنين شباب نزلوا وراحوا عند الإشارة (( اللي بين الشامية و كيفان )) و قعدوا ينظمون السير. . .

كنت أتمنى أخذ أساميهم عشان أشكرهم جدام الكل. . . الشيء الوحيد اللي أعرفة عنهم انهم كانوا 2 شباب واحد لابس قميص أرزق وأبيض و الثاني لابس تي شيرت أحمر. . .

شكرا شكرا شكرا شكرا. . .

والله كلمة شكرا صغيرة في حقهم. . .

شيء حلو اللي سووه. . .ليش؟!

لأن كانوا يقدرون انهم يقعدون بمكانهم و يتحلطمون مثل غيرهم. . . بس إهما قرروا انهم يكونون غير الناس. . . ويساعدونا و يساعدون الشرطة اللي تأخرت وأيد. . .

مرة ثانية. . . يعطيكم العافية. . . وما قصرتوا. . .

(( يارب تفتح عليهم مثل ما فتحوا علينا. . . ))

وأتمنى من الشباب ان إذا صار مواقف مثل هذه ان أنتوا تبادرون بالمساعدة. . .

« MY SeNioR YeaR »

21F5D591

مذكرات طالبة خريجة. . . B)

قروب للكويتيين فقط. . . :$

http://5rejat-2011.blogspot.com/